Praat van ʼn goeie begin aan ʼn uitnemende loopbaan in taalwetenskap – dis hoe Carmen Coetsee voel oor die onlangse toekenning as Jong Taalkundige van die Jaar wat sy by vanjaar se South African Linguistics and Applied Linguistics Society (SALALS) se konferensie ontvang het. Die konferensie is van 25 tot 27 Junie by die Universiteit van Johannesburg (https://salals.org.za/conferences/) in Johannesburg aangebied.https://salals.org.za/conferences/).
Die jaarlikse konferensie is ʼn unieke en spesiale byeenkoms van akademici, navorsers en studente in taalwetenskap van regoor die wêreld en is daarop gemik om navorsing van regoor die wêreld te erken en te vier. Dit werk ook aan die bevordering van uitnemende taalnavorsing en moedig navorsing deur jong Suid-Afrikaners aan. Me. Coetsee se navorsing is vir aanbieding by die konferensie aanvaar. Sy het nog nooit ʼn aanbieding by ʼn konferensie gelewer nie en haar magisternavorsing het oorweldigende erkenning ontvang. “Hierdie toekenning beteken vir my alles. Dit was so ʼn groot eer net om die konferensie te kon bywoon en my navorsing aan soveel ongelooflike navorsers te kon aanbied; om hierdie toekenning te wen, het dus al my verwagtinge oortref. Ek is baie dankbaar,” sê me. Coetsee.
Hierdie toekenning bewys dat me. Coetsee se loopbaan in die akademie op die regte spoor is. As in ag geneem word dat dit haar eerste aanbieding as ʼn akademikus by ʼn konferensie was en sy ʼn toekenning kon inpalm, het die beoordelaars by die konferensie en die raad ooglopend groot potensiaal in haar strewe na ʼn akademiese loopbaan raakgesien. Dit is ʼn duidelike aanduiding van ʼn wonderlike loopbaan wat voorlê en ʼn voorspoedige akademiese reis vir hierdie jong akademikus van die Kindertaalontwikkelingsnode gehuisves by die Universiteit Stellenbosch.
Me. Coetsee het haar MA in Kindertaal afgehandel en haar unieke navorsing het gefokus op die taalinsette aan Afrikaanse kinders in laer sosio-ekonomiese gemeenskappe. Sy het in een Afrikaanse gemeenskap ondersoek hoe ouers met hulle kinders praat. Sy bevestig dat daar baie min oor die taalsosialiseringspraktyke van gemeenskappe wat buite die norm val (onderbestudeerde gemeenskappe soos dié van lae sosio-ekonomiese status en diegene wat onderbestudeerde tale, soos Afrikaans, praat) in globale en nasionale navorsing beskikbaar is. “Slegs as ons die ‘taalwetenskaplike uitleg’ (d.w.s. die taalsosialiseringspraktyke) van ʼn gemeenskap ken, kan ons met spraakterapeute begin saamwerk om kwessies soos taalvertragings in kinders aan te pak. My navorsing het begin om die uitleg van een so ʼn gemeenskap te karteer, met die doel om intervensieprogramme in die toekoms te kan skep,” sê sy.
Me. Coetsee is op die regte akademiese pad en beplan om haar studies voort te sit. Sy is tans ʼn projekbestuurder en jong navorser vir die Kindertaalontwikkelingsnodus wat by die Universiteit Stellenbosch gehuisves word.
As advies vir ander aspirant-akademici of diegene in haar vakgebied, reken sy dat daar nog soveel werk aan Suid-Afrika se 12 amptelike tale gedoen moet word; veral ten opsigte van hoe kinders hierdie tale aanleer. Ons het so ʼn ryk taalsamestelling in SA dat dit noodsaaklik is om te ondersoek hoe ons jongste burgers hierdie tale leer, beoefen en daarin groei. Namens die Fakulteit Lettere en Sosiale Wetenskappe wens ons me. Coetsee ʼn uitnemende akademiese loopbaan vol prestasies en eerbetoon toe.